اصعب يوم فى حياتى

بسم الله الحمن الرحيم

اصعب يوم فى حياتى

مش عارفه ليه من مده عاوزه احكى لكم على اليوم ده وقلت فرصه اعرف الايام الصعبه اللى عدت بحياتكم و الاعجب ان اليوم اللى كان ساعتها صعب جدا جدا بالنسبه لى تحول من الايام المميزه اوى عندى اللى تقريبا كل ما افتكرها احس انى عاوزه يا اما اضحك يا اما ابكى من الانفعال اللى لسه باحس بيه كل ما افتكره

اليوم ده كان اليوم اللى يسبق مناقشة مشروع التخرج فى الكليه النظام فى الكليه عندنا ان مشروع التخرج طول السنه مش بنعمل فيه شغل كبير .. يا دوب محاضره كل اسبوع وفى آخر السنه نقضى شهر كامل بعد امتحانات نهاية العام شغل فى المشروع بس و بيساعد الدكتور المشرف علينا شخص وظيفته انه مساعد باحث وده كان طالب متفوق فى دراسته لكنه لم يعمل معيد بالكليه لكنه بيدرس دراسات عليا زى المعيد .. المهم ان كان بيشرف علينا مساعد باحث مفيش بينى وبينه اى استلطاف مش عارفه ليه ماكانش بيعزنى خالص وانا اما حسيت بكده خت جنب و كشيت طبعا .. بس اعمل ايه انا مضطره اتعامل معاه ومش هينفع اقلبه زى ما باعمل مع امثاله المهم خلصت السنه على خير ومابقاش فاضل غير شهر المشروع .. وبدات المعاناه الحقه كل ما اسال اخينا ده على حاجه يقول لى اقرئى ال manual
اللى هو زى الكتالوج يعنى .. اقول له سعادتك قريت وعاوزه اسال فيما قرات يقوم سايبنى وماشى او يرد باجابه تضلم الدنيا زياده !!

انا طبعا الوقت اما بدا يمر ابتدت اعضابى تتعب ده مستقبل يا جدعان و الاخ هيضيع الخمس سنين هدر من غير ما اكون عملت له اى حاجه .. وماينفعش اشكيه للدكتور هيقول انى انا اللى باتدلع وياما بكيت قهرا منه ايام المشروع .. المهم يعنى ربنا وفقنى و فهمت الموضوع اللى كنا شغالين فيه من غير ما ربنا يحوجنا لحد وماخبيش عليكم كنت باحس انى باطلع له لسانى كل ما اشغل البرنامج اللى رفض يساعدنى افهمه

المهم وصلنا خلاص لليوم اللى يسبق تسليم المشروع و اكتشفت انى مفروض اكتب كمية كتابه غير طبيعيه وماكانش عندى كمبيوتر ساعتها و اضطريت اقيم عند خالتى عشان اكتب المشروع .. وده كان قبل نهاية الوقت ييجى باسبوع بس بردو ماخلصتش .. المهم قررت مع زملائى اننا نقضى اليوم الاخير ده كله فى الكتابه و تجميع الورق اللى كل واحد كتبه .. و بالفعل زميلى و زميلتى نزلوا معى ضيوف عند خالتى .. وقضينا طول الليل نكتب و نشخبط و نظبط .. المشكله ماكانتش فى التعب بس كانت فى احساسنا ان الوقت خلاص انتهى ونحن غير مستعدين حتى انى جلست مع زميلتى فى البلكونه قرب الفجر لقيتها بتعيط قلت لها بتعيطى ليه يا نهى؟ قالت لى انها حست لاول مره بغربتها لانها لم تكن من القاهره وطبعا رغم انى كنت عاوزه اعيط انا كمان من احساسى بالخوف بس ماكانش ينفع اعيط

المهم خلصنا شغل ييجى الساعه 6 صباح يوم التسليم .. و نمنا دقائق قبل ان نذهب للكليه .. وبصراحه كان المشروع جمييييييييييييل جدا .. لدرجة اننا واحنا بنطبع النسخ الخاصه بينا بدات ابكى ونهى تطبطب عليا واما وصلنا الكليه و سلمنا المشروع اللى كان هيتناقش اليوم التالى حسيت انى خلاص خلصت و اخدت الشهاده كمان .. حتى بقى شربنا شاى مع بعض المشرفين على المشروع ساعتها بس كان احساسى وقتها انه لم يعد بيننا اى فرق .. و اننا خلاص .. عدينا معلش طولت عليكم

--------------------------------------------------------------------------------

مع تحياتى :أمير العذاب

» اصعب جرح
» اصعب كلمات الحب
» اصعب فراق الحبايب
» لحظة الفراق اصعب ام لحظة الحنين ما بعد الفراق